الساعاتي – أ. نعمان الترس

الساعاتي

أ. نعمان الترس

للناس بِيبيع الوقت مَرّات

وبْيِشتِري مَرّات مِن حالو

وقِدَّيش بايِع بالدني ساعات

ما في وْلا ساعه من بَعد ما مات

“وقفِت” دقيقة صمت كرمالو

طير العمر

أوّل ما كنت زغير فوق سرير

والعمر كانت فشختو زغيره

لو شي حدا قَلّي العمر بيطير

من فرشتي نسّلت خيط زغير

وربطت عمري بـ خشبة سريري

دقن الجبل

لا هالشِتي رَجَّعْ تْلوجو مَيّ

و لا هالربيع اللّي رَسَمْ حَقلو

هَيدا الجبلْ راغي عَ دَقنو شْوَيّ

و الشمسْ شَفره جاتْ تِحلِقلو

لعبة تراب

هاك الصبي اللّي ضَوّ إمّو غاب

وصار العتم واصِل مَعُو لْ كِمّو

إمّو ما عادت ناطره عالباب

بـِ تْراب عَم يلعب… ما بِيهمّو

لا صَوت بَيُّو… لا زَعَل عَمّو

هِنّي قالولو الناس شِغل تراب

جَرَّب إزا بتزبط مَعو إمّو