وينو ؟ – مملكة السحر – نفق – أ. ورد العبدالله

أ. ورد العبدالله

وينو ؟

بِتنام عم تنطُر مَلاك المَوت

بِتفيق بعدَك ناطرو

وَينو ؟

يمكن وصِل عَاللّس  ما في صَوت

لَفّ وْ رِجع

وْخلّا مَسافة/ي بينَك و بَينو

و يمكن فِقِت حَدّو ومَنّو مَطرحَك

مَدّيت إيدَك عَالعُمر لَتقوم

مَا قْدِرت !

ما بين إيدَك وِ العُمر

كانت … كَإنّا واقفِة … عَينو!

مملكة السحر

شِايِف كَأنّو في عَتِم

بلَحظَة بِيصير نْهار

وْفِرسِان يِمشوا عَالنَّهِر

وِخْيولهُن وَقْت العَطَش

عَم تِشرَب مْنِ النّار !

سيوف البَرِق بِتْدِق عَ دروع الوَقِت

مَرٍّة غَرِب مَرَّة شَرِق

صَوت الرَّعِد أسرار !

شِايِف كَأنّو في حلا بْتِمّ البَحِر

سِكَّر !

سكّر مِتِل قَعَد الشِّعِر وِ ارتِاح

بي قَلب السطر

أهلا و سَهلا تْفَضَّلوا

فوتوا عَمَمْلِكْةِ السحر أحرار !

نفق

شِايف جِرح عَ رِكْبتِك

وْ يِمكِن عَتيق كْتير

مبَيِّن كأن تَحت الجِلِد

شَكلو متل حَرف الألِف

وطالِع بَعِد عَالخاصرَة/ا

مِتْل النَّفَق … تَحتِ الأرِض

حامِل رِمِح

وْ واصِل “سَهِل لِخْيِام”

بِالنّاصرَة/ا !