الـعَـيْـن مِـحَّـايِـي | جايِي الرّبيع يْلِمّني | أ. أنطوان خليل

أ. أنطوان خليل

(من ديوان “تْعَلَّمت عَ السّطر المَشِي”)

الـعَـيْـن مِـحَّـايِـي

مَعْقول مِنّي يُوقَع

الوَقْت الحِلُو؟

وكلّ ما مْشِيت شْوَيّ،

يِزْعَل مَطْرَحي؟

كلّ شي بْحِبُّو

بْضَلّني إتأمَّلُو،

بخاف لَوْلا بْرَمت فَجأَه…

يِنمِحي!

جايِي الرّبيع يْلِمّني

وِجّي أنا: مْرايِةْ خَريف، وما مَعو

بتُطْلِيعتُو غَير ورقتَيْن فْراقْ…

بِيهَرِهرُو الإشيا إزا نِتْفِي بْعِينَيِّي تْطَلَّعُو:

لمّا الشّجره بْتِشلَح تْيابا وْراق

بْلاقِي عِينَيّي عالأرض عم يُوقَعُو!!