فقير | دمع مصلوب | بدلة وطن | أ. رالف حدّاد

أ. رالف حدّاد

(من ديوان الأوّل “غَيْمي عَ باب الوَقتْ”)

فَقيرْ

تَحْت القَمَرْ،

ماشـي عَم يْصَلّـي الجِرِحْ…

وِالمَوتْ سابِقْ دَعسْتو فَوْق الرَّصيفْ.

وْهُوّي وْعَم يْهَجّـي بِبالو القَمِحْ،

دْموعو بِخاصِرْة الفُقرْ شَكّو الرِّمِحْ!

عارِفْ طَريقو كيفْ،

وْعارِفْ مَ رَحْ يِقْدِر يْوَصِّلْ عَ الصُّبحْ…

بَيْنو وْبَيْن المَقْبَرا… فـي رْغيفْ!

دَمعْ مَصْلوبْ

هَيْدا لْ قَبِلْ ما يِنْزَل بْيِلْمَعْ لَمِعْ،

بِعْيونْ كِلّ النّاسْ

إِسْمو: دَمِعْ.

وْبِعْيونْ هَ الإِمّ لّـي إِبْنا صارْ بِيرِتْبِةْ شَهيدْ،

هِيّــي وْعَم تْصَلّـي وْعَم يْشِقّا الوَجَعْ نُصَّينْ،

إِسْمو: مَسيح العَينْ.

بَدْلِةْ وَطَنْ

… وِبْتِدْقَرا،

وْبِتْشِمّْ

ريحِةْ كَرامـي

فايْحا مِنْ أَرضْ مِلْيانـي وَفا،

وْبِتْحِسّ إِنّا مْرَقَّطا

بِتْرابْ،

بِوْراق الشَّجَرْ،

وِبْهَمّْ.

وِبْيُوجَعَكْ

إِنّا تْكون مْرَقَّطا بِالدَّمّْ!