المجلةالمحكيّة اللبنانيّة
نَطرا | تهجايي | أ. باميلا شربل
أ. باميلا شربل
نَطْرا
بكيو مَقاعِدنا بعِد ما نعسِت النّطرا
ووَحدي أنا عَم لَوِّن السَّهرا…
نسيو بِصوتي دمعتُن
عينَيك
ونسيو عَ خصري لمسِتُن
إيدَيك…
ياما كنِت تحتِ البِكي
إقعد مع المَوعد
تنسى تجي تنسى الحكي…
وإمشي أنا ويمشي معي المقعد…
تهجايي
بْهَجّي الوَحي، فكرا وَرا فكرا
والوقت بيصير… ناطور العَتَب!
وِبْفَيِّة النّطرا
عيوني بتنصَلَب،
بشوف الحبر مَعجوق بالبُكرا…
وبُعْصر السّطر شْوَيّ… بينقِّط تَعَب!
