حلوة المرا – موت ما بيشبع – أ. بشير الجواد

أ. بشير الجواد

حلوة المرا

حلوة المرا ل بتنقرا تلميح

بغموضها ع سرّها تدلك

و شوي منها يسرقك كلك

حلوة تقلك كل حكايا الريح

من دون ما تقلك

حلوة المرا ل بتنصب مراجيح

بتركض الك بس ما بتوصلك

حلوة المرا ل ما بتنمحي

بيدبغ عليك حضورها و غيابها

و ما بيدبغ عْلى تيابها

الا طراطيش الوحي

حلوة المرا ل بتستحي بس تغمرا

و حب الخجل يكتر بضحكة بيدرا

و يكتّرا

لكن ل ما بتستحي

بتصير نص ركيك سهلة ينقرا

و ما بعود شوفا لا قصيدة و لا مرا

موت ما بيشبع

وبعدو نهر هالموت ماشي طلوع

مرغوب عندو موتن الممنوع

ساعة الروح بياكلا بقشرا

و بيغمسا بدموع

و رواح بعدا عالغضن عجرة

عم يقطفا نكاية بعين الجوع

و ع قد ما تعبّا طفالى زغار

عم حس صار بيحمل طباعا

كل ما شبع ت يكمل المشوار

و يسد جوعة بعد ما جاعا

في ايد ت تمشيه

بتخبط ع ضهر الموت بتدشيه

و يكمل رضاعه