عصفور أو شجرَه – د. إبراهيم شحرور

عصفور أو شجرَه

د. إبراهيم شحرور

محتار شجرَه صِير أو عصفور

لمّا غيابي يْدقّ عا بابي …

محتار : أصحابي يصيرو   طْيور

يمّا ورَق  وغْصون … أصحابي  …

بكبَر مَ بين اللوز  والزعرور

يمّا السّما أحلى مِنِ … الْغابِه ؟

عصفور تين بْكُون  يَمّا … تين

المنقار أحلى … أو الزوّادِه  ؟

شو بكون ؟ جانح عا غصن شربين ؟

أو كعب شربينِه بْ كعب وادي ؟

محتار نقّي موتتي مع مين

وْمين اللي إيدو مالحَه زيادِه :

يَ بْموت عا إيديْن حطّابين

يَ بْموت عا إيديْن … صيّادي …

بْحِبّ الشجَر … وبْحبّ لِعْصافير

وْبحسُد لِ ما بيطير … والطاير

لو كنت بعرف في شجَر بيطير

كنت الشجَر نقّيْت … عالطاير …

مدري شو صاير فيهْ

“””””””””””””””””

صرْلي عُمُر … شبر وْندِر … هالقلب عم ربِّيهْ

كلْما عطِش من دمعتي بسقيهْ

وْلَو جاع بعْملّو عروسةْ ضحك تا طعميهْ …

وْلمّا كبِر … مدري شُ صاير فيهْ …

متل الكتاب لْ ما حدا بْيقراهْ

مرمي عَ رفّ بْ مكتبِةْ يلّي اشْتراهْ

وْما في حدا بيمسّح الْغبرَه   وراهْ …

مدري شُ صاير فيهْ

متل الْبكي

لْ ما في حدا يبْكيهْ

متل الشّتي

لْ ما في وْلا غيمِه قبْلِتِ تْشتّيهْ

متل القصَب

واقف على ضفّةْ نهر

تَ يْسمّعو غْنانيهْ

والنهر مش قاريهْ …

متل النحل

موعود ب مْواسم زهر

تا  تنتلي  قْنانيهْ

وخايف يِجي نيسان … مَ يْلاقيهْ …