لَ يسوع – أ. جرمانوس جرمانوس
لَ يسوع
أ. جرمانوس جرمانوس
كلْ سِنه ، بمشي مَعَكْ عَ الجلجله :
وباخدْ معي باقة دموع مْشَكّله
وبْصوم عن حالي ،
عن خْيالي !
ومرّاتْ ما بعرف إذا عْيوني إلي !
يا واهب ” الوَزنه ” ؛
وحدَك بتعرف بالعتمْ حزني !
عْطَيتني إيدَيك :
وعْملتن رفاقْ !
عْطَيتني الإيّام :
وعملتن وراقْ !
عْطَيتني شجرة شِعرْ : راحِتْ دواق ْ !
كل سنه بمشي معَكْ :
بْلاقي ” ڤيرونيكا ” بفُوطه مْن الصلَا
بْتمسح عَرَق عم يوجَعَكْ !
بْتنزل تلاقيني الغَيمه مْن الفَلاَ :
ببكي عْلَيا بالسرّ تا ما سمّعَكْ !
يا صاحب ” الوَزنه ” :
بقبل يطَوّل بالشِعر حزني !
لملَمِت قَنْقوشة حطَبْ :
بْراس الجردْ
بالبردْ
عَ عَين التَعَبْ
سَرقو الحطب والمَوقدي ،
وإيدي وقاموس الندي !
ماشي معَكْ عَ الصَلبْ :
ماشي أنا والقَلبْ !
انتي زْرعت قلبي قبيلة وَردْ ،
فِتّنْ سَوا ، باكل فتافيتي
عم يبرق الراعي براس الجردْ :
باقي الكَبْريته معي بالبردْ
اعْطيهُن الكَبريته !
