حلم كذّاب – أ. إياد أبي علي

حلم كذّاب

أ. إياد أبي علي

كان الحِلِم أُوصَل ع هَالمَفرَق

إتقاعد وْبَعدو البحر أزرَق

وْبالمكتبه عندي كتير صحاب

كِلْ يوم إقرا كتاب ما إزهَق

سَكِّر كتابي وْيفتحو لِـ بْواب

إكتب سطر سطرين أو أنجَق

السّطرين … في أحيان … قدّ  كتاب

ما بيِنسَكَب مليان لِـ مْعتَّق

وْإذبَل مِتِل عِنّاب آخِر آب

وْإبقى حِلو وْلَو قَدّ ما مُرهَق

تذبَل عيوني وِالقدر غلّاب

وِنضلّ صَوْب الحرف نِتعَمشَق

بسّ الحِلِم بِبْلادنا كذّاب

المنديل لمّا لوّح تخَزَّق

كِلما الوطن كِذْب وْحَكي وِجْياب

مين اللي بَدّو عَ الكَبَر يشفَق؟

كِلْ يوم عَم إحسُب شي ألف حساب

وْلا باب ما دقّيت لَـ هلَّق

خايِف تَـ بُكرا دِقّ مِيّة باب

بين الشّبع وِالجوع في مَمرَق

كيفْ بِقشَع وْقَنديل نُمرو غياب

مِتل البكي بيغُصّ وِبيشهَق؟

بِالقبر بُكرا بيُوسَعو لِـ تياب

رَح ضلّ حتّى صير كيس تراب

كِلْ يوم إغدي وْإركُض وْإعرَق